بئر اليتيمه

بسم الله الرحمن الرحيم
تحياتي يا حلوين
بفتتح هالقسم بأول قصه من تأليف ماما >>فديت ماما انا[/color]
في سالفه من السوالف اللي صات زمان ..سالفه تناقلها الصغار قبل الكبار
كان ياما كان :
بنت حلوه مره وغاية في الروعه والجمال ....ولكن حظها في الدنيا كان قليل ..عاشت طفولتها يتيمه وكبرت محرومه
كانت تخدم في البيوت علشان لقمتها .. وفي يوم من الايام شافها شيخ وكان عند هذا الشيخ حلال ما له حصر وصار مو قادر يهتم فيه و أولاده تركوه وعاشوا في المدينه..فعرض على اليتيمه تساعده في الرعي ويضمن لها السكن والزاد ..
وافقت اليتيمه وكانت في قمه السعاده لانها شافت في هالشيخ حنان الاب اللي انحرمت منه ومرت السنين واليتمه عند هذا الشيخ تهتم بالحلال وتهتم فيه بعد ..
وفي يوم من الايام خرجت اليتمه كالعاده بعد الفجر للمرعى وهي تمشي وتراقب الحلال ..وكان فيه بئر معطله قريبه من المرعى صاحبها حفرها ولما ما طلعت له المويه تركها ..المهم البنت كانت ماشيه وسرحانه بهموم دنياها وتزلق رجلها وتطيح في البئر اللي كان ناشيف وعميق بالحيل وتموت اليتيمه..

مر النهار والشيخ يستغرب تأخيرها ويسأل عنها الرايح والجاي ..مافي أحد شافها..ومر يوم ويومين وكثر الكلام اللي يقول هربت واللي يقول يمكن قتلها وكثر الاتهام وتلطخت سمعه هاليتيمه ..وتمر سنه بعد سنه والقصص تكبر وتكبر ..
مات الشيخ وهو يسأل مافي احد شاف اليتمه..
وخلال هذي الفتره لاحظ الرعاة شي غريب
الأرض نديه ومحصول المزارع زايد ..
قالوا لازم نعرف مصدر هالحياة اللي دبت بالأرض من جديد ..وفعلا صار الرعاة يدورون عن السبب وتقودهم قدره الله للبئر المعطله ..
بس البئر ما عادت معطله نفتحت فيها العيون والماء يسيل منها على الأرض وكانت جثه اليتيمه طافيه فوق الما ..اخذوها ودفنوها وربي طهرها من كلامهم وسمو البئر بئر اليتيمه ..لكن هذي البئر ما كانت بئر عاديه ..كان فيها شفاء لكل عليل ..انشهرت البئر وصار الناس يجونها من كل مكان ..


وانتهت قصه بئر اليتيمه اللي كانت ماما تحكيها لعيال اخوي ناموا .

.وانا كنت مره مندمجه مع القصه سألتها ماما اللي تقولينه حقيقه.. ردت على وقالت فيها شي من الصحه مع شويه بهارات علشان تعجب الصغار.. وهذي البئر موجوده في جبال الجنوب..! عاد انا ودي اشوفها


انشاء الله تعجبكم القصه تحياتي لكم وألف سلام